ລີກສາຍ ກ ລະດູການ 2013 ອາດເພີ່ມທີມຕ່າງແຂວງ
ພາຍຫຼັງສຳເລັດການແຂ່ງຂັນເຕະບານລີກສາຍ ກ ລະດູການ 2012 ເມື່ອທ້າຍອາທິດຜ່ານມາ ຊຶ່ງສະໂມສອນ ປກສ ສ້າງປະຫວັດສາດ ຄວ້າແຊັມເປັນສະໄໝທຳອິດມາຄອງ ດັ່ງນັ້ນ ສະຫະພັນບານເຕະແຫ່ງຊາດລາວ (ສຕລ) ກໍ່ສືບຕໍ່ກຽມຄວາມພ້ອມໃນການຈັດການແຂ່ງຂັນໃນລະດູການ 2013 ໂດຍຈະວາງແຜນດຶງເອົາທີມເກັ່ງຈາກແຂວງພາກໃຕ້ ກໍ່ຄືສະຫວັນນະເຂດ ແລະ ຈຳປາສັກ ເຂົ້າຮ່ວມ ພ້ອມທັງຈະມີການໃຫ້ແຕ່ລະສະໂມສອນກຽມສະໜາມຕົນເອງເພື່ອແຂ່ງຂັນໃນບ້ານແລະ ນອກບ້ານ.
ຈາກການໃຫ້ສຳພາດຂອງທ່ານ ໄຊບັນດິດ ຣາຊພົນ ຮອງປະທານ ແລະ ເລຂາທິການ ສຕລ ກັບທີມຂ່າວກີລາ ໃນວັນທີ 16 ກໍລະກົດ 2012 ວ່າ: ສຳລັບການແຂ່ງຂັນເຕະບານລີກສາຍ ກ ລະດູການໜ້າທີ່ຈະເປີດສາກຂຶ້ນຕົ້ນປີ 2013 ນີ້ ຄາດວ່າຈະມີຈຳນວນ 10 ທີມຄືເກົ່າ ຫຼື ຫຼາຍກວ່າເກົ່າ ໂດຍພວກເຮົາມີແຜນກຽມດຶງເອົາທີມເກັ່ງຈາກພາກໃຕ້ ເຊັ່ນ ສະຫວັນນະເຂດ ແລະ ຈຳປາສັກ ເຂົ້າຮ່ວມຄັດເລືອກກັບທີມທີ່ຢູ່ອັນດັບ 8-9 (ເພື່ອນພັດທະນາ ແລະ ລາວລ້ານຊ້າງ) ລະດູການ 2012ຜ່ານມາ ແລະ ອີກສອງທີມຈາກສາຍ ຂ ເພື່ອຄັດເອົາທີມທີ່ໄດ້ມາດຕະຖານຮ່ວມລີກສາຍ ກ ລະດູການໜ້າ ນອກຈາກນີ້ ປີໜ້າພວກເຮົາຈະມີການປ່ຽນແປງລະບົບການແຂ່ງຂັນ ເພື່ອແຂ່ງຂັນໃນບ້ານ ແລະ ນອກບ້ານ ໂດຍສະເພາະຈະໃຫ້ແຕ່ລະສະໂມສອນປັບປຸງສະໜາມຂອງຕົນເອງ ເພື່ອກຽມໃສ່ໃຫ້ທັນກັບການແຂ່ງຂັນລະດູການໜ້າ.
ไม่มีความคิดเห็น:
แสดงความคิดเห็น